ಚೆಲುವು ಬಂದು ಕರೆಯಿತೆನ್ನ

ಒಲುಮೆ ಮಾತಿಗೆಳೆಸಿತೆನ್ನ

ಹಾಡು ಹೂವು ಹನಿಗಳೆಲ್ಲ

ಇಲ್ಲಿ ಒಲವ  ಚಿತ್ರವೇ

ಎದೆಯ ಭಾವ ಮಾತ್ರವೇ

 

ಅಲ್ಲಿ ಇಲ್ಲಿ ಚಪ್ಪರದಲಿ

ತಬ್ಬಿ ಬೆಳೆದ ಮಲ್ಲೆ ಬಳ್ಳಿ

ಹಿಡಿಯ ತುಂಬಾ ಬಿಳಿಯ ಹೂವ

ನೀನು ತಂದ ದಿನವನು

ಹೇಗೆ ನಾನು ಮರೆವೆನು?  

 

ತಂಗಾಳಿಗೆ ಮೋಡವುದುರಿ

ಸೊಗದ ಸೋನೆ ಹನಿಗಳುದುರಿ

ಸಗ್ಗ ಭುವಿಗೆ ತಂದ ಸೊಗಸ

ಹೇಗೆ ನಾನು ಪಡೆಯಲಿ

ನೀನು ಇರದ ದಿನದಲಿ ?

 

ಎಲ್ಲೋ ಕೇಳಿ ಮರೆತು ಹೋದ

ಹಾಡ ಮತ್ತೆ ಎದೆಗೆ ತಂದ

ನಿನ್ನ ಒಲವ ರಾಗಕೀಗ

ನನ್ನ ಕವಿತೆ ನೀಡುವೆ

ಎಂದೂ ನಲಿವ ಬಯಸುವೆ

 

ISHWARA BHAT K